Janë shpërndarë kontrata për mbështetje financiare përmes masës për mbështetjen e një anëtare aktive femër në ekonominë shtëpiake bujqësore nga programi për zhvillim rural

Kryesuesi i Agjencisë për përkrahje financiare në bujqësi dhe zhvillim rural - Nikica Baçovski së bashku me ministrin e Bujqësisë, Pylltarisë dhe Ekonomisë së Ujërave Ljupço Nikolovski sot në ambientet e Klubit të Deputetëve prezantuan kontratat për mbështetje financiare për një anëtare aktive femër të ekonomisë shtëpiake bujqësore.
Drejtori i Agjencisë, Nikica Baçovski, theksoi se është një masë që synon përmirësimin e përfshirjes socio-ekonomike të grave nga zonat rurale duke stimuluar aktivitetin e tyre ekonomik në vendet ku ato jetojnë.
“Është një masë nga programi i zhvillimit rural për të cilin është publikuar një thirrje publike që ka përfunduar në maj të 2022. Pas procedimit të kërkesave të pranuara, janë miratuar projektet e 70 aplikantëve. Parimi i mbështetjes bazohet në grant 100% me të cilin do të financohen investime deri në vlerën maksimale prej 360.000 denarë” – thekson Baçovski.
Me këtë mbështetje financiare pritet të modernizohen kapacitetet prodhuese të grave rurale me investime në pajisje për përpunimin e rrushit, tharëse diellore, pajisje për pasterizim, pajisje për prodhimin dhe përpunimin e foragjereve, si dhe pajisje për prodhimin e mjaltit dhe produkte të tjera të bletëve.
Ministri Nikolovski në prezantimin e tij theksoi rëndësinë e gruas në shoqëri, por edhe në veprimtarinë bujqësore përmes prodhimit të produkteve finale nga lëndët e para bazë bujqësore dhe blegtorale si qëllim kryesor i vetë masës.
“Me mjetet nga granti, fermerët femra mund të blejnë pajisje për prodhimin e verës, linjat e prodhimit të foragjereve, pajisje për prodhimin e mjaltit dhe produkteve të bletës, pajisje për mullinj, makina mjelëse, kallëpe djathi, makina për përpunimin dhe bluarjen e mishit dhe pajisje të tjera për përpunimin, me të cilat do të mund të zhvillojnë produkte të reja, marka të reja dhe vlerë të re të shtuar në ekonominë maqedonase, pikërisht në zonat rurale” – theksoi Nikolovski.
Agjencia për Mbështetje Financiare në Bujqësi dhe Zhvillim Rural do të lidhë kontrata me të gjithë përfituesit e duhur me afat për realizimin e investimeve deri më 31.12.2023.
Mjetet financiare për përkrahjen e projekteve janë siguruar nga programi për zhvillim rural dhe kapin shumën prej afro 20 milionë denarë.