Drejtoresha e Agjencisë për Mbështetje Financiare në Bujqësi dhe Zhvillim Rural, Daniela Irotova Lazareva, sot në ambientet e komunës së Karbincit zhvilloi një takim me rritësit e deleve. Në takim u prezantuan programet që janë në dispozicion të fermerëve. U theksua hapja e Agjencisë me qëllim tejkalimin e problemeve të blegtorëve, por edhe informimi i tyre për realizimin e pagesës së subvencioneve të mbetura nga disa vite.
“Po përpiqem të vendos një dinamikë për pagesë të rregullt të detyrimeve, megjithëse duhet të pranoj se u përballëm me obligime të papaguara për vitet 2023, 2024 dhe 2025, ku e gjithë programi nuk është realizuar. Po përpiqemi, brenda mundësive të buxhetit që kemi, të shlyejmë të gjitha detyrimet e prapambetura. Vetëm në këtë periudhë prej 30 ditësh kemi paguar 1 miliard e 400 mijë denarë detyrime të mbetura, ndërsa në thesar kemi dorëzuar edhe 540 milionë denarë, një pjesë e të cilave mund të paguhen deri në fund të muajit. Vazhdon dinamika siç i kemi paguar pemëtarët dhe perimtarët për Shën Trifunin. Jemi në bisedime për lartësinë e mjeteve që kemi për të paguar masat që kanë qenë më të prekura dhe që prej vitesh nuk kanë marrë subvencione, siç është grupi i blegtorëve, të cilët ishin të përfshirë në masën e vitit 2024”, theksoi drejtoresha Daniela Irotova Lazareva.
Për një numër të madh blegtorësh, problematike mbetet masa për vitin 2024. U shpjegua se ajo është e tillë siç është dhe nuk mund të ndërhyhet nëse është reaguar me kohë, ndërkohë që shumica e blegtorëve nuk kanë qenë të vetëdijshëm se si kjo masë do të ndikonte në pagesa. Fakt është se pagesa është vonuar dhe duhej të reagohej me kohë në vitin 2025. Nga 2,200 të paraqitur, vetëm 800 i plotësojnë kushtet minimale për dorëzimin e qengjave në kapacitetet therrëse. Nuk është marrë parasysh përjashtimi i krerëve të rinj joprodhues dhe meshkujve nga kushti për përmbushjen e 50% të dorëzimit të qengjave në vitin 2024. Ky kriter ka qenë shumë i vështirë për t’u përmbushur nga blegtorët. Megjithatë, për diçka që ka ndodhur në vitin 2024, tani në vitin 2026 nuk mund të komentohet apo të ndërmerren masa, theksoi drejtoresha.
Në takim me blegtorët morën pjesë edhe punonjës të Agjencisë, përgjegjës për shqyrtimin e dokumentacionit dhe kontrollin në terren. Së bashku me blegtorët, në mënyrë direkteë sistem u verifikuan të gjitha të dhënat lidhur me lëndët e tyre. Të gjithëve u dhanë informacione për çështjet kontestuese për shkak të të cilave aplikimet e tyre janë refuzuar ose janë ende në procedurë. Një aplikim përmban dokumente nga disa institucione, të cilat blegtorët, për shkak të mungesës së informacionit, nuk i kanë plotësuar ose i kanë dorëzuar gabimisht. Ata u udhëzuan se si t’i eliminojnë këto mangësi, me qëllim që të përfitojnë ndihmën shtetërore.
